В то же лета прислашяся Глебъвичи, Всеволод и Володимер, князи Рязаньстии к Всеволоду Юрьевичу, ркуще: «ты господин и отець нашь, разсуди межи нами: Роман брат нашь старейшин уимает волости у нас, слушает тъстя своего Святослава, а к тобе крест целовал». Всеволод же поиде к Рязаню; бывшу же ему Коломны, и сретоста его Глебовичи ту, Всеволод и Володимир; он же прият их в любовь, и ту на Коломне яша Глеба Святославича, Всеволожа внука, и посла его Всеволод Володимерю, и поиде от Коломны.

Того же лета князи Рязаньстии... въсташа на меншую братью свою... и бысть зла крамола в земли их, и искаша брат брата убити. Послаша же к нима звати их к собе на совет лестию, да како бы яти их; она же уведевше се начаста град твердити. Се же слышавше братья их, яко город твердят, и собравше вой множство идоша на них к Проньску и начаша воевати грады их и села, а си затвористася в Проньсце. Услышав же се князь великы Всеволод Юрьевич и посла к Глебовичем, Роману и Игорю и Володимеру, посол свои, хотя смирити их, дабы не было кропролитиа межи братьею, и рече к ним: «что тако, брате, деете, губяще землю свою. Се бы не дивно, аще погании пришедше воевали землю вашу, а се ныне хощете сами братию побити». Они же то слышевше въсприяша буи помысл начаша гневатися на нь, и болшу вражду въздвигати и рать замышляти. Всеволод же с братом Святославом посласта ис Пронска в Володимерь к великому князю Всеволоду Юрьевичю, помощи просяще, и посла к ним Володимерьскые дружины 300. Слышев же Роман с братома пришедших в Пронь Володимерцев и пришедше объседоша град и бишяся крепко. Всеволод же Юрьевич посла к ним ину помощь свояка своего Ярослава Володимерича, а из Мурома Володимира и Давыда. Бывшем же им у Коломны, и слыша их Роман с братьею, и бежаша от града. Всеволод оставив брата Святослава в граде, а сам иде к Коломне противу Ярославу и Володимиру и Давыду, и поведа им, яко слышавше их бежаша от града Роман с братьею, и взратишяся оттуду к Володимирю. Всеволод же иде с ними к великому князю Всеволоду Юрьевичю, а Роман слышев то, оже възратишяся, и нде с братома к Проньску. Святослав же затворися в граде и бьяхутся крепко; преяша же у гражан воду, и изнемогаху людие безводнем. Роман же посла в град к брату Святославу, глаголя: «не морися голодом с дружиною и людей не мори, но выиде к нам, по что блюдешися брату своею, не ты бо нам ратен, но Всеволод, ты же не приставай к нему». Бояре же его начата ему молвити: «брат твои шел в Володимерь тобе выдав, отвори град». Он же послушав их отворися. Братья же его вшедше в град, и приведоша его к крестному целованию и посадиша и в том же граде, а что Всеволожи дружины, тех всех повязаша, княгиню же Всеволожу сноху свою и с детми ведоша в Рязань, и бояре его и имение их все розоимаша, и Володимерце многы повязаша, иже беху прислани в засаду к ним. Всеволод же услышев полонену жену и з детми, и бояре его и дружина вся и именье всех взято, а брат передался, и печален бысть вельми, и пришед из Володимиря седе в Коломне, и поча воеватися с ними, и бысть ненависть межи ими люта.

Того же лета ходи князь великы... на Рязань, а с ним Ярослав Володимерич, свояк его, и Володимер Юрьевич Муромскы, и Всеволод Глебович с Коломны с ними же иде на братью свою. И перешедше Оку, и поимаша все власти и села Рязанскаа и всю землю ту пусту створиша, пограбиша и пожгоша и полон мног поимаша, и възратишяся в свояси.