Всеволод Святославич Черьмныи вниде в Кыев и седе в ним, надеяся на множство вой своих, и розосла наместникы своа по всем градом Киевъскым. Рюрик [Ростиславич, князь киевский] же видев свое непогодие отъиде в свои Вручии, а сын его Ростислав иде в Вышегород, а Мъстислав Романович седе в Белегороде. И по том Всеволод Чермныи посла в Переяславль к Ярославу Всеволодичю, река ему: «иди ис Переяславля к отцю своему в Суждаль, а Галича под моею братьею не ищи, аще ли не идешь добром, то иду на тя ратью». Ярославу же не бысть помощи ни от кого же, и посла к нему, пути прося у него. Всеволод же целовав к нему крест и да ему путь; иде же Ярослав ис Переяславля к отцю своему, и посади Всеволод Чермьныи в Переяславли сына своего [Михаила]... Рюрик Ростиславич совокупився с Мъстиславом Рамановичем и с сынъми своими и с сыновци своими и выгна ис Кыева Всеволода Чермьнаго и сына его ис Переяславля... Зимы же тоя [1206/ 07 г.] Всеволод Чермьныи совокупився с своею братьею и с сыновци своими и с Половци иде на Кыев. Рюрик же не мога противу им стати затворися в Кыеве; они же стояша около города 3 недели възратишяся граду не успевше ничто же.

поидоша Олговичи опять на Рюрика к Кыеву, Всеволод Чермныи с своею братьею и с сыновци своими, а ис Турова и ис Пиньска Святополчичи, и пришедше к Днепру и перебродишяся противу Треполю и объступишя и, и бысть брань крепка зело, затворил бо ся бяше в нем Ярославль сын Володимерича, и стояша у него 3 недели. Изнемогшим же людей в граде, и предашяся ему. Он же омирив их устремися на Кыев, прииде же к нему из Галича в помощь Володимер Игоревич. Рюрик же слышев то, оже идет на него рать бесчислена отвсюду, а не бысть ему ни от кого же помощи, и беже ис Кыева во Вручии, а в Белогороде затворился Мъстислав Романович, они же устремешася на Белгород, и пришедше оступиша его, и бысть брань люта, людие же изнемогоша в граде. Видев же Мъстислав множство около града, а помощи не бысть ему ни от кого же, и нача пути просити. Всеволод же целова крест и да ему путь, он же иде Смоленьску в свою отчину. Они же оттуду поидоша к Торцьскому, Мъстислав же Мъстиславич [Удатный] затворися в нем, и отступиша его, и поганые [половцы, нанятые Всеволодом Святославичем Черемным] распустиша воевати, и много зла створиша по земли той, пленующе и секуще и села жгуще. Мъстислав же, не терпя быти в граде, целова к нему крест на его воли.

Мъстислав Романович поиде из Смоленьска на Кыев с братьею, с Володимером Рюриковичем, и Костянтин и Мъстислав Давыдовичи, и Мъстислав Мъстиславич из Новагорода, и Инъгвар Ярославич из Лучска. И бывшем им у Вышегорода и пустиша изгон к Киеву; Всеволод же Святославич не утръпя бежа за Днепр с братьею своею, и мнози людие истопоша в Днепре, бежачи в Чернигов. Идоша же по нем князи к Чернигову, и оступиша в граде Глеба, брата его, а Всеволод преставися, и стояша около города 3 недели, и много зла створиша, и пригород пожгоша и села, и по том управишяся и целовавши крест межи собою раззидошяся. И седе в Кыеве Инъгвар Ярославич, а Мъстислав Романовичь в Вышегороде, а Мъстислав Мъстиславич иде к Новугороду, по том же управившеся дата Киев Мъстиславу Романовичи), а Инъгвар иде опять к Лучьску.