Того же лета здумавше Олгови внуци ити на Половце, не ходиша бо с князьми Русскими, но поидоша сами собою ркуще: «мы есмы ци не князи, таковы же собе хвалы добудем». И сняшяся у Переяславля Игорь Святославич из Новагорода Северьского со двема сынома, и брат его Всеволод ис Трупьча [Трубчевска], и Олгович Святослав из Рыльска, и Черниговъская помощь, и внидоша в землю Половечьскую. Слышавше же Половци поидоша, ркуще: «братия наша избита, а инии изнимани, а се опять идут на нас». И послашяся по всей земли своей, а сами поидоша противу князем, ожидающе дружины своее, а князи таки поидоша к вежам их. Они же не пустяще и в веже свое, сретоша их дружины своее не дождавше и съступишяся обои, и побежени бывше Половци, и биша их до вежь, множство же полона взяша жен и детии, и стояша на вежах 3 дни, веселящеся, а ркуще сице: «братия наша ходили с Святославом с великым князем и билися с Половци, зряще на Переяславль, а они сами к ним пришли, а в землю их не смели по них ити, а мы в земли их есмы избили их, а жены их и дети у нас в полону, а еще пойдем за ними за Дон и до конца избьем их, и аще будеть нам ту на них победа, то идем по них и до лукомориа, иде же не ходили ни деди наши, да возмем си до конца честь и славу». Сия же глаголюще, а строениа божиа не ведуще. Останок же избьеных тех прибегоша к дружине своей, иде же бяху преже весть послали, и сказаша им свою погыбель, они же слышавше поидоша противу князем, а по другая послашяся. И сретшеся с ними бишяся стрелци межи собе 3 дни, и копьи снимашяся, ожидаху бо Половци дружины своеа, а сим к воде не дадуще приити. Приидоша же Половци вси к дружине своей, и бысть их многое множество. Ольговичи же видевше их ужасошася и величаниа своего отпадоша, еще же изнемогли бяху и безводием сами и кони от зноя, и поступиша мало к воде, по 3 бо дни не пустили их бяху к воде. Половци же устремишяся на них, и притиснуша их к воде, и бишяся с ними крепко, и бысть сеча зла велми, друзии же с конь съседше бьяхуся, уже бо и кони под ними изнемогли бяху. Побежени же быша князи Русстии гневом божиим, и изъимани быша вси, а боляры их и дружина вся избиты бяху, а инии изъимани и ти язвени, и възвратишя с победою Половци, а про князей Русских не бе кому и вести принести за наше согрешение и гордость. Некто же гость [купец] поиде путем тем, Половци же приказаша с ним к Русскым, глаголюще: «подите по свою братью, или мы к вам идем по своих». Слышавше же то князи о братье своей и о боярех и о всех христьяньскых воех, яко така им бысть погыбель, и возопиша вси в болезни сердца, и бысть плачь и стенание в них, овем убо братия избита и изнимана, а другым отци и ближикы. Князь же Святослав Кыевъскы посла по сыны свое и по все князи, и приидоша вси в Кыев и выступиша к Каневу. Половцы же услышаша всю землю Русскую идущу бежаща за Дон, князи же взратишяся в Кыев и разъзидошяся кыиждо в свояси. Услышаша же Половци князей взратившихся и гнаша отаи к Переяславлю и взяша все городи по Суле, у Переяславля же бишяся день... Половци же со многом полоном възратишяся в веже свое. По малех днех Игорь Святославичь, Олгов внук, утече у Половець, не оставить бо господь праведнаго в руку грешничю; гониша же по нем и не обретоша его; и тако избави его бог из рук поганых; прочих же начата твердо держати и многыми железы отягчати их.